Hiligaynon News: 3 ka bulan nga 'closed season' sa Visayan Sea nagapadayon

SYUDAD SANG ROXAS, Capiz, Nob. 29 (PIA) – Naga-epekto na ang tatlo ka bulan nga “closed season” sa portion sang Visayan Sea kasunod sang seremonya nga ginpatigayon sang Bureau of Fisheries and Aquatic Resources (BFAR) sadtong Nobyembre 15 sa Culasi Port diri sa syudad sang Roxas.

Ang nasambit nga limitasyon ang para lamang sa pagpangisda sang bulaw, guma-a, tabagak, tuloy kag balantyong kon sa diin ang magalapas nga mga mangingisda ang may nagakaigo nga penalidad base sa ginasaad sang Fisheries Administrative Oder No. 167 – 3 nga amo ang nagamandu sang pagdumili sa pagpangisda sang nasambit nga mga isda humalin Nobyembre 15 tubtob Pebrero 15, 2019.

Ginpahayag ni Remia A. Aparri nga direktor sang BFAR – 6 nga malab-ot ang handum nga maproteksyonan kag madumalahan sang maayo ang Visayan Sea agud maka-prodyuser sang madamo pa gid nga mga isda indi lamang sa karon nga katawhan kondi sa masunod nga henerasyon kon ang tanan magabuylog sa kampanya.

Ang implementasyon sang FAO 167-3 ang nagatuyo nga magkonserba kag magprotekta sang nasambit nga mga isda nga magabihod, magapamuto, magadamo kag magadalagko sa masunod nga tatlo ka bulan.

Samtang kapin naman sa 32 ka mga sakayan ang nadakpan sang gintingob nga pwersa sang BFAR kag natungdan nga mga ahensya sang gobyerno subongman mga lokal nga panguluhan sa pagpatuman sang FAO 167-3 sang nagligad nga Nobyembre 15, 2017 tubtob Pebrero 15, 2018.

Nahibaluan nga may gamit nga Visible Infrared Imaging Radiometer Suite (VIIRS) Program ang BFAR agud nga ma- monitor ang presensya sang mga sakayan pangisda sa Visayan Sea ilabi na sa ti-on sang “closed – season.”|

Dugang pa diri amo ang ginatawag nga “floating assets” sang BFAR nga ginalakipan sang MCS vessels, 30-footer patrol boats kag 40-footer fiber glass boats.

Ang Visayan Sea ang ginapalibotan sang 33 ka mga kabanwahanan ukon syudad nagikan sa lima ka mga kaprobinsyahanan sang Rehiyon 5, 6 kag 7. (AAL/PIA6 Capiz)

News Feed:

https://pia.gov.ph/news/articles/1015560
Latest News | Philippine Information Agency