Hiligaynon News: Pinakamalayo nga mga sitio lab-uton sang CAPELCO

SYUDAD SANG ROXAS, Capiz, Pebrero 1 (PIA) -- Ginpahayag ni Engr. Edgar Diaz nga general manager sang Capiz Electric Cooperative (CAPELCO) nga pagalab-uton sang serbisyo sang kooperatiba ang tanan nga pinakamalayo nga sitio ukon komunidad sa probinsya pag-abot sang tuig 2022.

Gindugang pa ni Diaz sa iya mensahe sa 13th Tri-Media Fellowship Night sadtong Enero 28 sa Capiz Gym diri sa syudad sang Roxas nga kapin sa pito ka porsiyento na lamang sang kabilogan nga mga sitio sa probinsya ang wala pa malab-ot sang kuryente kaangot sa Sitio Electrification Program (SEP) kag Barangay Line Enhancement Program (BLEP).

Ang talalupangdon nga mga inisyatibo sang kooperatiba kaangot sa SEP kag BLEP amo ang paglab-ot sang kuryente sa komunidad sang mga Ati sa Brgy. Aglalana sa banwa sang Dumarao sang tuig 2017 kag paglab-ot sang serbisyo sang CAPELCO pinaagi sa tatlo ka kilometro nga submarine cable sa isla sang Olotayan diri sa Roxas City sang tuig 2018.

Ang paglab-ot sa mga sitio nga inisyatibo ang ginpatigayon sang kooperatiba matapos nga nakumpleto na ang elektripikasyon sang mga kabaranggayan sa probinsya sadtong Marso 2005.

Samtang ang pagdala sang serbisyo sang kuryente sa mga sitio ang kaangut sa programa sang National Electrification Administration’s (NEA) para nga mapasanyog ang pinakamalayo nga mga komunidad kag mabuligan ang mga pumoluyo sa kaimulon pinaagi sa mga palangabuhi-an nga madulot sang elektrisidad sa ila tagsa ka mga lugar.

Nahibaluan nga ang NEA sa bulig sang mga electric cooperatives ang nakapasiga sang 1,931 ka mga sitio sa bilog nga Pilipinas sang tuig 2018.

Ang nagapadayon nga sitio electrification ang naga-target naman sang kapin 775 ka mga sitio sa bug-os nga pungsod karon nga tuig 2019. (JBG/AAL/PIA Capiz)


News Feed:

https://pia.gov.ph/news/articles/1017954
Latest News | Philippine Information Agency

Comments