Cebuano News: Obligasyon sa tanan ang pagprebentar sa sunog -- Naval Mun. Fire Marshal

NAVAL, Biliran, March 11 (PIA) -- Sa pagsaulog sa Fire Prevention Month niining buwan sa Marso, miingon si FInsp. Zardoz B. Abela, Naval Municipal Fire Marshal, nga obligasyon sa tanan ang pagprebentar sa sunog.

Si Abela miingon nga dili lamang saligan ang mga bombero pagpanginano sa palibot sa mga panimalay o establesamento  apan angay kini tan-awon ug panginanoon sa mga tag-iya o okupante sa maong mga dapit. 

Dili usab angay ingnon nga walay trabaho ang mga bombero kay walay sunog.  Ang kawalay sunog mao na ang sukdanan nga nagtrabaho ang mga bombero tungod kay ilang gimonitor o gitan-aw ang mga panimalay ug mga establesamento  aron kini magsunod sa gilaan sa balaod ug mamahimong luwas batok sa sunog.

Gawas pa niini, nagpadayon ang ilang buhatan pagpahigayon ug mga kalihokan pagpasamwak sa mga kasayoran ug pamaagi nga malikayan ang sunog, dugang pa ni Abela.

Dili usab angay magbangutan ang publiko nga walay trabaho ang bombero kay walay sunog.  Sa kanunay, angay nato hunahunaon nga  walay nasunogan nga nalipay, sumala pa ni Abela.

Atol sa Pulong-Pulong ng Bayan sa Radyo Natin-Naval nga gipasiugdahan sa PIA-Biliran, and batan-ong hepe sa Naval Fire Station mibutyag nga niini lamang unang tulo ka buwan sa tuig 2019, nakatala na ang ilang buhatan sa usa ka sunog sa panimalay ug unom ka sunog sa kasagbotan.

 Sa pagkaalarma sa maong mga insidente, ang Naval Municipal Fire Station mopahigayon ug road show karong umaabot Marso 21, Huwebes nga adlaw, sa Biliran Province State University (BiPSU).

Palakipon nila sa maong kalihokan ang mga kabataang  nagpanuigon ug 5 ngadto sa 14 anyos tungod sa mga datus nga sagad mga kabataan ang sagad mabiktima sa pagkasunog, matod pa ni Abela.

Dugang pang mga kalihokan nga ilang gilaan niining buwan sa pagprebentar sa sunog mao ang pag-open house sa ilang buhatan alang sa mga tinun-an.

Ang Fire Prevention Month celebration niini nga tuig nahasentro sa temang, “Ligtas na Pilipinas Ating Kamtin, Bawat Pamilya ay Sanayin, Kaalaman sa Sunog ay Palawakin.” (LDL/MLT/PIA-8, Biliran)

News Feed:

https://pia.gov.ph/news/articles/1019482
Latest News | Philippine Information Agency