Fora sa women empowerment, kinamatarong sang LGBT, kabataan natalana

SYUDAD SANG ILOILO, Marso 15 (PIA) -- Empowerment sang mga kababaenhan kag kinamatarung sang lesbian, gay, bisexual and transgender (LGBT) kag kabataan ang mangin sentro sang duha ka mga palahayagan nga pagahiwaton diri sining syudad bilang kabahin sang selebrasyon sang National Women’s Month sini nga Marso.

Pagapangunahan ang public forum nga  “National Conversation on Women’s, LGBT and Children’s Rights and the Feminization of Poverty” sang Ugsad Regional Gender Resource Center sa Nakatungdan Bisayas, Marso 15. Pagahiwaton ini sa UPV Auditorium, Iloilo City campus sumugod alas otso y medya ang takna sa aga.

Si Liza Maza, anay lead convenor sang National Anti-Poverty Commission ang gin-agda nga resource speaker.

Patigayunon man ang forum nga “Empowering Women and Girls through Local Governance” sang Regional Gender and Development Committee (RGADC) sa Nakatungdan Bisayas sa Marso 29 sa RDC Conference Hall, NEDA VI Office.

Ang pagtililipon maga-highlight sang mga pagpanikasog natuhoy sa GAD mainstreaming sa probinsyal nga level. Ini nagatuyo nga tan-awon ang disparities, gaps sa paghatag sang mga serbisyo kag pagbalay sang mga polisa sa nanuhaytuhay nga konteksto sa mga lokal nga panguluhan sa probinsya kag pagkilala sa mga pagpanikasog sang local government unit (LGU) kag civil society organization (CSO) natuhoy sa GAD mainstreaming kag adbokasiya.

Tinutuyo man sini nga tukibon ang posible nga mga estratehiya sa pagsabat sang gaps/disparities kag gender issues sa level sang mga lokal nga panguluhan.

Samtang, nagtalana man ang Ugsad sang iban pa nga mga aktibidad para sa isa ka bulan nga selebrasyon nga nagalakip sang Bazaar kag Pre-Loved Sale nga magalawig tubtub Marso 15 sa UP Auditorium Grounds. Bukas ang Bazaar humalin alas otso sa aga tubtub alas singko sa hapon.

Subong man sa Biyernes, Marso 15, pagabuksan ang isa ka Art Exhibit kag may hiwaton nga mga short play, tanan sa UPV Iloilo City campus. 

Ang Ugsad isa ka katapo nga ahensiya sang RGADC nga nagakoordinar sa mga aktibidad may kaangtanan sa gender sa rehiyon kag nagarekomendar sang mga gender-related nga mga polisa sa Regional Development Council VI. (JBG/laf/PIA6-Iloilo)

 

 

News Feed:

https://pia.gov.ph/news/articles/1019770
Latest News | Philippine Information Agency