Aklanon News: Mga senior citizens sa Aklan, ginapahaba ro pasensya

KALIBO, Aklan, Hulyo 29 (PIA) -- Gin apelar ni Evangelina Gallega, Provincial Social Welfare and Development Officer (PSWDO) sa mga senior citizens sa Aklan  nga pahabaon pa gid ro pasensya bangud nga hasta makaron hay owa gihapon nakabaton ku andang social pension para sa mga buean halin it Enero hasta Hunyo it dag-on ngara halin sa Department of Social Welfare and Development (DSWD).

Ginpa-abot rayang pag apelar ni Gallega sa pakipag-angot kana it sangka estasyon iya agud ipaathag sa publiko partikular sa mga senior citizens ro rason kon ham-an owa gihapon ro andang social pension ma release.

Sa idaeum it programa ngara para sa senior citizens, kada kwalipikado nga resipyente hay makabaton it P500 kada buean ukon P1,500 kada tatlo ka buean.

Ginpaathag ni Gallega nga sa dag-on ngara, nagpatigayon it balidasyon it listahan it mga benefisyaryo it social pension  para hibuoe ro mga ngaean it ratong mga retirado nga nagabaton it ibang pension halin sa gobyerno, ngani hay owa gihapon it release.

Ro pagbalidar, hambae ni Gallega, hay ga imbolbar it pag kumparar it listahan it mga senior citizens sa listahan man man it Philippine Veterans Affairs Office (PVAO), Government Service Insurance System (GSIS); ag it Social Security System (SSS) agud mabuoe sa listahan ro mga ngaean nga may pension eon agud indi eon sanda mangin benefisyaryo it social pension.

Nag-apela man si Gallega sa mga senior citizens nga mangin honest ag akuon eagi-eagi nga sanda hay retirado ag may pension eon bangud nakabutang man eagi sa guideline nga rato eamang nga owa it ginabaton nga iba nga pension ro maka entra sa programa ngara para sa senior citizens.

Gindugang pa gid niya nga sa kada barangay sa Aklan hay gakieilaea man lang ro tanan ngani masayran man eagi idto kon ro sangka miyembro hay retirado ag pensyonado eon, agud indi eon maeakot sa listahan it mga benefisyaryo.

Sa maabot nga buean ngara it Agusto, ginhambae ni Gallega nga basi mabaton eon it mga senior citizens iya ro andang pension bangud sa Rehiyon 6, ro mga benefisyaryo it pito nga banwa sa Iloilo hay nakabaton eon ku anda ku Hulyo ngara. (JBG/VGV/PIA6 Aklan)

News Feed:

https://pia.gov.ph/news/articles/1025087
Latest News | Philippine Information Agency