Aklanon News: Pagbukas it World Blood Donors Month sa Aklan, may 116 nga donors

KALIBO, Aklan, Hulyo 9 (PIA) --  Ro pagbukas it World Blood Donors Month sa Aklan paagi sa paghiwat it sang adlaw nga Mobile Blood donation (MBD) nga aktibidad ku Hulyo 3 hay nakapatigayon it madinaeag-on  nga pagdonar it dugo it 116 nga mga Aklanon.

Ro aktibidad hay ginhiwat sa City Mall Kalibo kon siin ro “blood—letting” hay ginhiwat mismo sa Activity Center kara sa pagpanguna it Philippine Red Cross (PRC), Provincial Health Office (PHO), Department of Health (DOH), Aklan Blood Coordinating Council (ABCC), ag sa pagsuporta it rotary International District 3850 Rotary Clubs of Kalibo ag Metro Kalibo, Metro Kalibo Community Rotaract Club, ag LGU-Kalibo.

Ro mga blood donors nga nag-adto sa aktibidad hay sa eain-eain nga mga edad kon siin ro iba hay una pa eang nga nagdonar, may regular man nga ga donar nga naghalin sa Philippine National Police (PNP), Bureau of Fire Protection (BFP), mga grupo pareho ku Brotherhood of Aklan Riders, The Guardians, MMS Foundation, mga amigo ag kapamilya it Rotary, mga Kalibonhon ag mga umadto eang, sun okay Melrose Lunn, Presidente it ABCC.

Antes ro “blood-letting”, si Dr. Felma dela Cruz it Aklan Medical Society (AMS) ag sa ngaean it ABCC hay nagtao it matag-od nga oryentasyon sa importansya it pagdonar it dugo ag kon ano ro mga dapat ag bukon it dapat nga obrahon it sangka tawo nga gusto magdonar it dugo.

Sa pihak nga parte, si Rotary District 3850 Governor Dr. Raphy Tayco hay naghambae man nga ro anang proyektong legasiya bilang gobenador it Rotary hay ro pagbulig sa PRC nga makatipon it kalidad nga supply it dugo.

Ro daywa ngarang NGO hay nagpirma man sa sangka Memorandum of Agreement (MOA) para sa rayang inisyatibo, suno  kay Lunn.

Ro PRC, kaibahan ro PHO, DOH ag mga  katuwang kara hay nagatinguha nga makatipon it nagakaigo nga supply it dugo sa tuyo nga makasalbar it kabuhi it mga Aklanon eabi ratong nagamasakit it dengue, mga biktima it aksidente, nagapaidaeum sa dialysis, operasyon, ag iba pang mga baeatian.

Halin ku Enero hasta it Hunyo it dag-on ngara, may 1,405 eon nga kaso it dengue sa Aklan kon siin 15 eon ro namatay.

Ro MBD sa City Mall Kalibo hay ginbuligan man it mga volunteer doctors sa Aklan, PRC Blood Services Medical Technologists, mga medical students it West Visayas State University (WVSU), ag halin man sa mga Municipal Health Office (MHO) nga mga grupo. (JBG/VGV/PIA6 Aklan)


News Feed:

https://pia.gov.ph/news/articles/1024244
Latest News | Philippine Information Agency

Comments