Cebuano News: Lokal nga kagamhanan katimbang pagpatuman sa katungod sa PWDs

TAGBILARAN CITY, Bohol, July 18, (PIA)—Dako og mahimo ang mga kagamhanan nga local aron ikapadangat na ang mga pribilihiyo nga gilatid sa balaod alang sa mga tawo nga dunay kabilinggan o persons with disability (PWD).

Kini mitumaw human napabati sa mga PWDs nga may mga pipila pa ka lugar sa Bohol diin sila gihikawan pa gihapon sa ilang mga pribilihiyo sa pagpamalit og tambal, panakyanan ug bisan na gani sa mga nag-unang paliton.

May disbentaha na nga daan tungod sa kabilinggan sa lawas, ang PWDs, lakip na sa mga senior citizens gihatagan og pabor sa balaod sa dagway sa mga diskwento sa ilang pagpamalit sa mga nag-unang panginahanglan.

Tuyo sa Republic Act No. 10754 nga kahatagan ang mga PWDs sa kahigayunan nga makaapil sa panon sa katilingban, ug kay dehado na sa ilang kahimtang, gimandu sa balaod ang paghatag kanila sa 20% nga diskwento ug pagpalingkawas sa value added tax sa pagpalit sa pipila ka mga gamit ug serbisyo nga gitumbok sa Republic Act No. 9442.

Didto sa open forum sa pagbukas nga programa sa paghandum sa National Disability Prevention and Rehabilitation Week (NDPRW), gisumbong sa us aka PWD sa Talibon nga gihikawan siya sa diskwento sa tambal.

Matud pa niya, ang paghikaw, tungod sa branded ang tambal nga iyang buot paliton.

Lain nga PWD usab ang mireklamo kay wala hatagi sa diskwento sa iyang pagsakay sa de-pasahero-an.

Didto sa Kapihan sa PIA, gipasabut sa Administrative Assistant sa Provincial Disability Affairs Office nga si Jowel Robin nga angayan usab tingali nga mahibaw-an kon unsay rason sa pagdumili sa paghatag sa diskwento.

May mga tambal nga wala sa resita sa PWD ang dili maapil sa diskwento kay kining mga tambal, nagdepende sa resita ug sa matang sa disability nga nakabutang sa disability ID.

Gawas pa, mahimo, matud pa nga ang lungsod nga maoy naghatag sa business permit sa mga establisemento nga mohatag unta sa diskwento ang mopatuman niini.

Hinuon, butyag usab sa representante sa Department of Health nga si Develyn Agor, mahimo nga ang DOH usab ang magpatuman niini.

Kini susama ra usab sa panakyanan, nga mahimo nga aksyonan og una sa lungsod ang sumbong, ug kon dili mahilot, mahimo na nga isaka sa mas labaw nga tinugyanan.

Sugyot sa Department of Trade and Industry sa Bohol pinaagi ni Officer in Charge Jose Hibaya, isumbong sa DTI kay ang DTI na ang moduso sareklamo ngadto sa hingtungdan.

Hinuon, importante, matud pa ni Robin, nga nay mosumbong aron masayran sa kadaghanan ug mahimong may kaaksyonan ang kagamhanan.

Ang tema nga gisagop sa NDPRW mao ang local na pamahalaan, kabalikat sa pagpapatupad sa mga karapatan ng mga taong may kapansanan. (rahc/PIA-7/Bohol)


News Feed:

https://pia.gov.ph/news/articles/1024849
Latest News | Philippine Information Agency

Comments