Cebuano News: Publiko, gi-awhag ni Duterte sa pagsumbong sa korupsyon

MANILA, July 23 (PIA)--Gi-awhag ni Presidente Rodrigo Duterte ang publiko nga i-report ang mga kaso sa korupsyon sa gobyerno.

Sa iyang ika-upat nga State of the Nation Address (SONA) niadtong Lunes, miingon ang Presidente nga mahimong i-report sa bisan kinsa ang kaso sa korupsyon ug uban pang reklamo sa Palasyo sa Malakanyang pinaagi sa 8888 hotline number.

Giseguro sa Presidente nga batokan gayud sa Malakanyang ang korupsyon sa gobyerno.

“Malacanang is open 24 hours basta corruption,” pahayag pa ni Duterte.

Nagpahinumdom usab ang Presidente nga isumbong lamang ang mga tinuod nga kaso sa korupsyon aron dili makasakit og ubang tawo.

Kalabot niini, gimando sa Presidente sa mga local government units (LGUs) ug mga ahensya sa gobyerno ang pagpakusog sa kampanya batok sa korupsyon.

Dugang pa sa Presidente nga bisan siya mismo dili makasiguro kun kanus-a mahuman ang korupsyon sa nasod bisan sa iyang 35 ka tuig nga pangatungdanan sa gobyerno.

“When will corruption end? Well, I don’t know. I’ve been in government for 35 years,” pahayag pa ni Duterte.

Kahinumdoman nga unang gilusad ang 8888 hotline human gilagdaan sa Presidente ang Executive Order No. 6 niadtong Hulyo 2016. (ecb/PIA7-Bohol)

News Feed:

https://pia.gov.ph/news/articles/1024979
Latest News | Philippine Information Agency