Cebuano news: Army mipadala ug CST sa San Fernando, Bukidnon

MARAMAG, Bukidnon, Sept. 14 (PIA) — Ang 88th Infantry “Maringal” Battalion (8thIB) sa Philippine Army bag-ohay lang mipadala sa ‘Community Assitance Team’ para magserbisyo sa lungsod sa San Fernando ning probinsya sa Bukidnon.

Si Lt. Col. Franklin F. Fabic, ang 88IB Commander, miingon nga kabahin kini sa ‘Community Support Program kon CSP’ nga gimbuhaton sa Philippine Army, diin ang mga grupo sa kasundaluhan motabang sa komunidad diha sa pagpahigayon sa mga kalihukan ug inisyatibo nga kinahanglan ipatuman sa ilang lugar. Kini pinaagi usab sa pakigtambayayong sa lokal nga kagamhanan.

Kini nga mga ‘team’ sa sundalo didto i-‘assign’ sa pito ka mga lugar sa San Fernando partikular sa barangay Namnam, Magkalungay, Cawayan, Little Baguio, Tugop, Nacabuklad, ug Halapitan.

Sa gipahigayon nga ‘send-off ceremony’ atol sa ‘convocation’ sa munisipyo, malipayon nga gi-‘welcome’ ni Mayor Levi Edma ang CST nga tropa sa kasundaluhan.

“Isip alagad sa katawhan, responsibilidad nako ang mga butang nga dunay kalabutan sa seguridad, kinahanglanon, ug kalambo-an sa katawhan. Nagtu-o ko nga ang kalampusan sa pagkab-ot sa kahusay ug kalinaw, pinaagi sa Executive Order No. 70 ni President Rodrigo Duterte, anaa sa atong mga kamot. Busa, atong suportahan ang mga kalihukan ug programa sa gobyerno. Gi-awhag ko kamong tanang katawhan nga makiglambigit diha sa mga programa ug proyekto sa atong lugar tungod kay dili nato makab-ot ang atong gidamgo nga kalambo-an kung dili malinawon ang atong komunidad,” matud sa Mayor.

Ang CSP kabahin usab sa ‘multi-sector approach’ sa Army aron matutokan ang mga hini-usang panimbasog sa ka-barangayan aron ma-solusyonan ang mga hinungdan sa panagbangi. Sa ingon niini, ang katawhan magkinabuhi nga malinawon ug produktibo.

Gi-awhag usab ni Lt. Col. Fabic ang aktibo nga partisipasyon sa komunidad aron matabangan ang gobyerno sa paningkamot niini nga undangon na ang armadong panagbangi ug insurhensya.

“Ang uban pang pamaagi aron tapuson ang insurhesya mao ang kooperasyon ug pagtinabangay. Segun sa gisaysay sa EO 70, ang pakiglambigit nagpasabot nga gikinahanglan ang partisipasyon sa katawhan. Kami na ang bahala sa ‘armed components’ sa mga teroristang CPP-NPA dinhi sa lungsod sa San Fernando. Ang Dragon Warriors dili mo-undang pag-gukod kanila,” dugang ni Fabic. (Norven Jay Garcia, CMO Officer, 88th Infantry Battalion, 4ID, PA/PIA Bukidnon)

News Feed:

https://pia.gov.ph/news/articles/1027354
Latest News | Philippine Information Agency