Aklanon News: Aklan naghiwat it Statistical Forum

KALIBO, Aklan, Oktubre 21 (PIA6) --  Sangka statistical forum ro ginhiwat sa probinsya it Aklan kurundaya eamang bilang sambilog sa mga aktibidades sa pag obserbar sa National Statistics Month.

Gin-organisar ro statistical forum it Gobyerno Probinsyal it Aklan paagi sa Provincial Planning and Development Office (PPDO) nga gintambungan it mga pinuno ag representante it mga nasyonal ag lokal nga mga upisina it gobyerno, ag maestra ag estudyante it sari-saring eskuylahan sa Aklan.

Si Dr. Cornelio V. Cuachon, Provincial Health Officer I it Provincial Health Office (PHO), ro una nga presenter sa forum, nga nagtalakay sa pinakaulihi nga sitwasyon it dengue sa probinsya kon siin ro nangin Reactor kara hay si Lyneth R. Mendoza, Program Director it Barangay RU 92.9.

Sa pihak nga parte , si Rowena Dailisan, Tourism Operations Officer II it Aklan Provincial Tourism Office (APTO) hay nagpresentar it “Tourism Statistics Before and After the Closure of Boracay Island”  kon siin nangin “Reactor” kara si Odon Bandiola it Sanggunian ng Panlalawigan (SP).

Sa gin presentar ni Cuachon, nakit-an nga may 5,398 eon nga kaso it dengue ro halista it Aklan Provincial Epidemiologist Surveillance Unit (APESRU) halin ku Enero hasta Oktubre 5, 2019 kon siin ro banwa it Kalibo ro may pinakamataas nga kaso nga 20 porsyento it kabilugan nga mga kaso, ag may pinakamataas man nga “attack rate” nga 127.61 porsyento.

Ro mga edad nga nagmasakit it dengue hay halin it sangbuean (1 month) hasta it 91 anyos, kon siin ro mga ga edad halin it 11 hasta it 20 ro may pinakamataas nga numero it kaso.

May 23 eon nga mga Aklanon ro namatay sa dengue ag 45 nga mga barangay sa Aklan ro may “clustering” it mga kaso.

Ginsugid man ni Cuachon nga sa 10 nga mga barangay sa Aklan nga may pinakamataas nga numero it nagka dengue, pito ro halin sa Kalibo.

Samtang, sa Comparative Statistics it nag-aeabot nga mga turista antes ag pagkatapos it pagsara it Boracay sa sueod it 6 nga buean, nakit-an nga ku 2017, ro isla hay nakabaton it 2,001,974 nga mga lokal ag dumueuong nga mga turista nga nakarehistro it 16 porsyento nga annual growth rate ag nakapatiyog it P56,147,744,220.60 nga “tourism receipts.”

Ku 2018 kat ginsara ra it 6 nga buean para i rehabilitar ag limpyuhan, 941,868 eamang nga mga turista ro nakabisita, ag raya hay nagrehistro it -53 porsyento nga pagtubo ag nakapatiyog it P28,463,594,704.20 nga “tourism receipts.”

Sa dag-on ngara halin it Enero hasta Septyembre, ro isla hay nakabaton eon it 1,601,139 nga mga bisita nga may ginpatiyog nga P45,873,454,898.90 nga “tourism receipts.”

Ginaeauman nga ro habilin nga tatlong (3) buean) hay magadaea pa gid it abu nga turista ag kadugangan nga “tourism receipts”, suno  kay Dailisan.

Ro Presidential Proclamation No. 647 hay naga deklarar sa buean it Oktubre it kada dag-on bilang National Statistics Month nga ginpaguwa ni anay Presidente Corazon Aquino.

Sa dag-on ngara, gina obserbahan ro ika 30 anyos nga National Statistics Month nga may tema nga “Data Innovation: Key to a Better Nation”. (JBG/VGV-PIA6 Aklan)

News Feed:

https://pia.gov.ph/news/articles/1028935
Latest News | Philippine Information Agency