Cebuano News: ‘ART Tabo sa Bohol’ gilusad; magpadayon matag adlaw’ng Lunes

TAGBILARAN CITY, May 20 (PIA) -- Gilusad sa Kagamhanang Probinsiyal sa Bohol pinaagi sa Office of the Provincial Agriculturist (OPA) ang “Agricultural Rural Transformation (ART) Tabo sa Bohol” sa Carlos P. Garcia Park nga nahimutang sa New Capitol Site ning syudad niadtong Lunes sa buntag, Mayo 18. 

Ang "ART Tabo sa Bohol" ipahigyon matag adlaw’ng Lunes gikan alas 8 sa buntag taman alas 5 sa hapon isip tabang sa mga mag-uumang Bol-anon sa pagbaligya sa ilang mga produktong agrikultura.

Kining Tabo magsilbi usab sa mga empleyado nga gustong mamalit og mga produktong pang-agrikultura sa mas ubos nga presyo kun itandi sa merkado og sa mga malls.

Matud pa ni Assistant Provincial Agriculturist Dr. Larry Pamugas nga kining programa susama sa gipahigayong tinuig nga programa sa OPA sama sa niaging tuig nga “Tabo sa Plaza,” nga temporaryong gihunong una tungod sa padayong renovation sa Plaza Rizal nga nahimutang atbang sa karaang capitol building.

Ang mga produktong ginabaligya sa tabo naglakip sa: isda gikan sa Bohol United Fish Traders Group; bugas (Rice Processing Center and Misiona Rice Mill); dairy products (Bohol Dairy Cooperative); utanon (Bilar Stem Vegetable Farm and LGU-Jagna); prutas (LGU Dimiao and LGU-Jagna); karne sa baboy (Stephen Boncales); pinya ug melon (PNB-KGB Multi-purpose Cooperative/Carmen Farmers Bagsakan Center); itlog ug cooking oils (3C Enterprises); dressed chicken (Agape R & R Foods); ug mga  Boholano delicacies sama sa bingka, budbod, suman (A.I.M. for Progress sa Balilihan ug mga ilimnon gikan sa P & P Enterprises). 

Ang "ART Tabo sa Bohol" uban sa “KADIWA on Wheels” (mobile market), gipasiugdahan sa Kagamhanang Probinsiyal sa Bohol ug sa Department of Agriculture (DA) nga ginapahigayon sa mga piniling munisipalidad nga mamaligya sa mga nag-unang panaliton sa mas baratong presyo isip alternatibong palitanan sa mga kunsomidor aron dili na moadto pa sa mga merkado  ug malls aron mamalit.

Si Gob. Arthur Yap una nang nanawagan sa mga Bol-anon sa pagsuporta sa mga mobile market isip tabang sa mga mag-uuma nga mokita sa ilang produkto. Usa usab kini ka paagi nga malikayan ang paghugop sa katawhan sa mga merkado ug malls aron mamalit sa mga nag-unang produkto ning panahon nga gipaubos kita sa general community quarantine tungod sa coronavirus disease (COVID) 19 pandemic. (ecb/PIA7-Bohol)

News Feed:

https://pia.gov.ph/news/articles/1042271
Latest News | Philippine Information Agency