Cebuano News: Pagtuon: 5-7 buwan human maCOVID, lawas may lig-on nga antibodies

MAS MAAYO PA GIHAPON ANG PAGLIKAY SA KAGAW. Dili na kinahanglan pa sa lawas sa tawo ang maghimo og antibodies batok sa COVID-19, kon kaya lamang sa mga antobodies sa lawas ang kagaw nga makasulod. Mao nga tambag sa PIA Bohol, ayaw pasudla ang kagaw sa lawas pinaagi sa pagbutang sa imong kaugalingon nga panalipod. (PIA Bohol) 

TAGBILARAN CITY, Bohol, Oct. 21 (PIA) -- Bisan pa sa giingon nga aduna nay naayo sa coronavirus disease (COVID-19) apan gibalikan sa impeksyon, niay gipagawas nga pagtuon kabahin sa kapasidad sa lawas nga magmugnag iyang kaugalingon nga panalipod.

Segun sa usa ka pagtuon, sulod sa lima ngadto sa pito ka buwan human sila masakit sa COVID-19, napakita sa lawas sa mga kanhi pasyente nga nauli-an, nga ang ilang lawas nagmugna na og taas nga kalidad sa antibodies nga mahimong makigbatok na sa susamang sakit.

Gani, kini gituohan nga kini maoy timailhan nga makabatan gayud ang lawas og hangtud sa tibuok kinabuhi na niya nga panalipod o lifetime immunity sa susamang sakit. 

Segun sa usa ka pagtuon nga gimantala na sa Immunity Journal, kini importante nga kasayuran kay mahimong kini timaan nga ang makasit sa COVID-19, mahimong makabaton na og immunity sa sakit sa tibuok niyang kinabuhi, segun pa sa mga eksperto.

Ang antibodies, mga magdagway og protein nga gigama sa lawas sa tawo alang sa iyang panginahanglan niini, sakyan sa mga antibodies nga maoy makigbugno sa mga kagaw nga mahisulod sa lawas sa tawo.

May mga nag-una nga pagtuon ang nagtimbang timbang sa inisyal nga epekto sa antibodies sa pagsugod og atake sa kagaw.

Sa pagtuon, human sa pag-atake sa kagaw sa lawas, naghimo kini dayon sa antibodies, ug mikibra ang gidaghanon niini sa dihang migrabe ang pag-atake sa kagaw.    

Apan segun sa usa  ka eksperto, mahimong ingon niini ang nahitabo kay ang gibasehan sa pagtimbang o assessment sa antibodies, kadtong mubo nga kinabuhi sa plasma, ug dili kadtong may tag-as nga kinabuhi nga plasma.

Ang plasma nga may mubo og kinabuhi maoy mahimo sa lawas aron pagtubag sa impeksyon. 

Samtang sa laing bahin, ang plasma nga may tag-as nga kinabuhi, maoy maghimo sa tinag-as nga immunity batok sa impeksyon.

Sa pagtuon nga nag-ingon nga mingkunhod ang kadaghanon sa antibodies dihang mingatake ang kagaw sa lawas, ang gitan-aw lamang sa nagtuon mao ang mugbo og kinabuhi nga plasma. (rahc/PIA-7/Bohol)

News Feed:

https://pia.gov.ph/news/articles/1056574
Latest News | Philippine Information Agency