Kinaray-a News: DTI nagpahanumdom sa mga negosyante nga magsunod sa Standards Law

SAN JOSE, Antique, Nobyembre 30 (PIA) -- Nagpahanumdom liwan ang Department of Trade and Industry (DTI) sa mga establisyimento sa probinsya kang Antique nga magsunod sa quality standards sa pagbaligya kang andang mga produkto.

Suno kay Trade and Industry Development Specialist Glen Fernando, nagahiwat ang DTI kang monitoring kag enforcement nga mga hirikuton sa mga negosyo nga sakop kang mandatory standards certification nga naangot man sa Standards Law.

”Kun maghambal kita nga mandatory, gina-subject dya sa testing kang accredited nga mga laboratoryo kang Bureau of Philippine Standards antes kang distribution kag pagbaligya, ” pagpaathag ni Fernando.

Nalakip sa mga produkto nga ginakabig nga “mandatory” amo ang electrical supplies, construction materials, household appliances, kemikal kag mekanikal nga mga produkto.

Nadumduman nga nagpatigayon ang DTI kang enforcement nga aktibidad kang 2019 sa banwa kang San Jose kun sa diin dya ang nagresulta sa pagbuol kang masobra sa sara ka libo nga mga substandard nga steel bars.

Ginpahayag man ni Fernando nga ang tubtub sa mga establisyemento nga wara pagsunod sa layi ang makabaton kang mga multa kag pormal nga charges.

Sa piyak nga bahin, gin-abisohan man ang mga konsumidor nga mangin vigilante sa pagbakal kang mga substandard nga mga produkto bangud dya ang makahalit sa kabuhi kag mga propidad.

“Nagakadapat nga may tayuyon kita nga kawsa agud matudluan kag mangin aware ang mga nagabaligya kag konsumidor kay buhay run dya ang aton mga layi sa product standards. Apang, indi naton ma-negar nga may rugyan pa gid nga mga nagalapta nga mga uncertified products,” pahayag ni Fernando.

Suno man sa DTI, ang mga certified products may rugyan kang mga marka kaangay kang product safety and quality seal kag import commodity clearance. 

Ginahingyo man ni Fernando ang mga negosyante nga magpangayo kang bulig sa DTI kun sila ang naga-duda sa kalidad kang produkto nga gina-supply kananda. (JSC/LML/PIA6 Antique)

News Feed:

https://pia.gov.ph/news/articles/1060523
Latest News | Philippine Information Agency