Cebuano news: Malacañang mideklara sa Sept 2 nga ‘holiday’ sa Bukidnon

MALAYBALAY CITY, Bukidnon, August 30 (PIA)—Gideklara sa Malacañang ang Lunes, Septyembre 2,  isip “special non-working holiday” sa Bukidnon alang sa kasaulogan sa ika-105 nga anibersaryo sa pagkamugna isip probinsya kon “105th founding anniversary.”

Pinaagi sa ‘Proclamation No. 799’ nga pinirmahan ni Executive Secretary Salvador C. Medialdea niadtong milabay’ng 28 sa Agosto 2019, ubos sa mando ni President Rodrigo Duterte, gideklara ang September 2, adlaw’ng Lunes ning tuig isip ‘holiday’ sa tibuok probinsya.

Hinuon, miingon si Gov. Zubiri nga ang mga seremonyas ipahigayon gihapon kini sa Septyembre 01, adlaw’ng Domingo.

Ubos niini nga proklamasyon, si President Duterte miingon nga angayan gayod magselebrar ang katawhan sa Bukidnon busa hatagan sila sa tibuok kahigayonan aron makigduyog sa okasyon ug uban pang kasadya sumala sa gitakda nga kalihukan ug seremonya.

Busa, aron mahatagan sa insaktong importansya ang maong okasyon, si Governor Jose Ma. R. Zubiri Jr. miingon nga “ang selebrasyon mas mahandumon tungod kay pinaagi sa pakigtambayayong sa Department of Agrarian Reform, ipahigayon sa maong adlaw ang pag-pang-apod-apod sa mga titulo sa yuta kon “Certificates of Land Ownership Award (CLOA),” samtang ipahigayon pud sa DENR ang ‘Handog Titulo’ ngadto sa mga benepisyaryo gikan sa nagkalain-laing lugar sa probinsya sa Bukidnon.

Ang “flag-raising” sa nasyonal nga bandila, probinsyal nga bandila, lakip ang mga bandila sa 20 ka lungsod ug duha ka syudad sa Bukidnon, usa usab sa mga nag-unang seremonyas atol sa kasaulogan nga ipahigayon sa Centennial Stage, Capitol Compound 

Sugod sa tuig 1860, ang Bukidnon sakop pa lamang sa probinsya sa Misamis hangtud gihimo na usab kini nga ‘sub-province’ sa Agusan niadtong tuig 1907.

Ang mga “historians” nag-ingon nga segun sa nahitala, ang Bukidnon gi-“separate” sa Agusan ug nahimong hingpit nga probinsya niadtong tuig 1914.

Ang lagda sa “Act No. 2408” nagpamatuod nga ang September 1, 1914 mao ang pagmugna sa Bukidnon isip hingpit nga probinsya sa nasud. (RLRB/PIA 10 Bukidnon)


News Feed:

https://pia.gov.ph/news/articles/1026707
Latest News | Philippine Information Agency

Comments