Cebuano News: Pagpasulod og baboy sa Bohol, gi-undang una tungod sa ASF

TAGBILARAN CITY, August 20 (PIA)--Mimandu ang Kagamhanang Probinsiyal sa Bohol sa temporaryong pagpugong sa pagpasulod og mga baboy ug ubang produktong gikan sa karne sa baboy apil ang pagpabiyahe sa mga buhi nga baboy pasulod sa lalawigan agi og  pag-amping sa industriya sa lokal nga baboyan gikan sa sakit nga African Swine Fever (ASF).

Si Gob. Arthur Yap sa usa  ka pahayag nga gipagawas karong buntag nagkanayon nga ang maong mga produkto tugotan lamang nga makasulod sa lalawigan kun may kuyog nga Veterinary Health Certificate nga gi-isyu sa lisensyadong veterinarian.

Gikinahanglan usab ang shipping permit nga gi-syu sa Bureau of Animal Industry (BAI) Quarantine Services.

Kalabot sa mga baboy ug ubang produktong baboy, ang lalawigan sa Bohol dili usab modawat niining mga produkto  kun dili inubanan sa tukmang Certificate of Meat Inspection gikan sa National Meat Inspection Service (NMIS).

Ang gipatumang pagdili sa pagpasulod sa mga baboy, tungod sa nagka-grabeng sitwasyon sa Luzon diin ang Department of Agriculture (DA) nagdumili sa pagkumpirmar o pagsalikway sa mga suspetsadong kaso sa mga nangamatay nga baboy tungod sa posible nga ASF.

Si Yap nagkanayon nga magpagawas usab siya og memorandum ngadto sa mga hingtungdang mga mayor sa Bohol aron motabang sa mga assigned personnel sa pag-tabang sa port quarantine efforts sa mga pantalan samtang ang Provincial Veterinarian gimanduan usab sa pakig-koordinar sa mga mayor sa kalungsoran, Municipal Agricultural Officers (MAOs), Barangay Livestock Aide (BALA) ug technicians nga hugtan ang monitoring sa mga umahan ug sa paghimo sa sayo nga pagtaho.

Gimanduan usab sa Gobernador ang mga namuhi og baboy sa paglikay sa swine swill feeding ug ang pag-instalar dayon og bio security measures sama sa pagbutang og mga foot baths ug ang pagpahigayon og regular disinfection sa mga umahan.

Gisugyot usab ang pag-implementar sa vaccination o bakuna batok sa cholera ug deworming.

Kini agi og pagkonsiderar sa industriya sa baboyan sa Bohol nga maka-apekto sa 30,000 ka panimalay sa 21 ka munisipalidad ug labaw sa P6 bilyon nga kantidad kun dili mopatuman og mga lakang aron maseguro ang proteksiyon ug malungtarong lokal nga industriya sa pagpamuhi og mga baboy. (ecb/PIA7-Bohol)

News Feed:

https://pia.gov.ph/news/articles/1026178
Latest News | Philippine Information Agency