Cebuano News: Petsa sa mga kalihukan sa 2020 Brgy, SK elections, gipagawas sa Comelec

TAGBILARAN CITY, Aug. 22 (PIA) -- Gipagawas na sa Commission on Elections (Comelec) ang mga petsa sa mga kalihukan alang sa 2020 Barangay ug Sangguniang Kabataan (SK) elections. 

Kini bisan pag may mga balaodnon nga i-oktaba ang nahisgotang piniliay.

Base sa Resolution Number 10573 sa Comelec, magsugod sa Marso 12 hangtod Marso 19, 2020 ang pagduso sa Certificate of Candidacy (COC).

Ang kinatibuk-ang election period magsugod gikan Marso 12 hangtod Mayo 18, 2020, samtang ang campaign period o panahon sa pagpangampanya magsugod sa Mayo 1 hangtod Mayo 9, 2020.

Ang deadline sa pagduso sa Statement of Contributions and Expenditures (SOCE) usab, gitakda sa Hunyo 10.

Gilatid usab sa nahisgotang Resolution sa Comelec ang mga prohibited acts o mga gidili sa panahon sa Election Period nga naglakip sa mosunod: bag-ohon ang lugar sa presinto o pagbutang og bag-ong presinto alang sa eleksyon; pagbalhin sa mga empleyado sa gobyerno; paggamit og security personnel o bodyguard kun walay pagtugot mismo sa Comelec; pagmugna og reaction forces ug strike forces; ug ang pagsuspender sa mga napili nga opisyal.

Samtang gidili sa panahon sa pagpangampanya ang paghimo og bisan unsang donasyon o gift in cash o in kind; pag-appoint o paggamit og special police o confidential agents; pagpatrabaho o maintenance sa mga barangay funded nga mga kalsada ug tulay; appointment o pag-hire og nga bag-ong empleyado, pagmugna og bag-ong position, promotion, paghatag og usbaw sa suholan, ug bayad o mga pribiliheyo.

Kahinumdoman nga niadtong State of the Nation Address (SONA) niadtong Hulyo, mismong si Presidente Rodrigo Duterte ang ni-anunsiyo o nihangyo nga himuon na lamang sa Oktubre 2022 ang eleksyon.

Gipasabot sa Comelec nga tungod kay wala paman na-aprobahan ang hangyo sa Presidente mao nga kinahanglan pa gihapon nilang pangandaman ang proseso sa eleksyong pang-barangay. (ecb/PIA7-Bohol)

News Feed:

https://pia.gov.ph/news/articles/1026286
Latest News | Philippine Information Agency