Tagalog News: Caraga police stations pinarangalan sa kanilang matagumpay na operasyon sa ibat-ibang kampanya ng gobyerno

LUNGSOD NG BUTUAN, Agosto 29 (PIA) -- Kasabay sa selebrasyon ng ika-118th Police Service Anniversary ng Philippine National Police (PNP) Caraga, pinarangalan ang mga natatanging police stations sa rehiyon dahil sa kanilang mga matagumpay na operasyon at kampanya sa ibat-ibang komunidad.

Sa nasabing selebrasyon na dinaluhan ni Lieutenant General Archie Francisco Gamboa, Deputy PNP Chief for Operations, kasama si PNP Caraga Regional Director Police Brigadier General Gilberto DC Cruz, tumanggap ng plake at tropiya ang Surigao del Sur Police Provincial Office dahil sa pagtulong sa maayos na pagsuko ng komander ng Guerilla Front Committee 30 na si Hermano Quezada at iba pang leaders ng grupong New People's Army. Nangunguna din ito pagdating sa kampanya laban illegal fishing, illegal logging, at sa kanilang pagkumpiska ng 37 bricks ng cocaine na nagkakahalagang mahigit P235 million.

Sumunod dito ang Butuan City Police Office na tumulong din sa maayos na pagsurender ni Ramilo Natividad, secretary ng Section Committee 15, Southern Mindanao Regional Committee (SMRC), at sa pagiging best performing sa kampanya laban illegal mining at illegal gambling.

Tumanggap din ng parangal ang Dinagat Islands Police Provincial Office dahil sa kanilang pagkompiska sa 47 bricks ng cocaine na nagkakahalagang mahigit P289 million. Ganun din ang Surigao Del Norte Police Provincial Office na nakakompiska ng 37 bricks of cocaine na nagkakahalagang mahigit P483 million.

Napabilang din ang Agusan del Norte Police Provincial Office as best performing unit sa Project Double Barrel Reloaded at sa pag-aresto ng most wanted person.

Ang Agusan del Sur Police Provincial Office naman bilang best performing unit sa kampanya laban loose firearms.

Ganun din ang 1st Special Action Battalion as best supporting unit sa internal security operation.

Sa kanyang mensahe, pinasalamatan ni Gamboa ang mga kawani ng mga nasabing unit o police stations sa kanilang pagsisikap at sa paggawa ng kanilang tungkulin at responsibilidad sa bayan.

Hinimok din niya ang lahat na mas patatagin pa ang kanilang mga inisyatibo upang masugpo ang ano mang uri ng kriminalidad at mapanatiling maayos at payapa ang rehiyon ng Caraga.

Samantala, maliban sa mga nabanggit na police stations ng rehiyon, tumanggap din ng award ang natatanging indibidwal na may malaking naitulong sa kapulisan upang maging matagumpay ang mga kampanya nito. (JPG/PIA-Caraga)

News Feed:

https://pia.gov.ph/news/articles/1026444
Latest News | Philippine Information Agency