Cebuano News: LGU S. Leyte magpugong nga makasulod ang ASF nga balatian sa probinsiya

Maasin City, Sept. 28 (PIA) -- Ang probinsiya sa Southern Leyte pinaagi kang Gov. Damian Mercado nagpagawas na og mga kamando-an agig pagpugong nga makasulod ang balatian sa baboy nga African Swine Fever (ASF) nga modapo sa mga himsog nga mga baboy sa probinsya sa Southern Leyte.

Ubos sa duha sa kamando-an sa Executive Orders No. 29 og No. 30 nga gipagawas ni Governor Mercado dili pa lang dugay kalabot sa mga lakang sa pagpugong sa pagsulod og pagkuyanap sa maong ASF nga balati-an, sumala kang Provincial Veterinarian Dr. Francisco Cabarrubias atol sa pakighinabi kaniya dili pa lang dugay.

Diin ang Executive No. 29 nagtutok sa pagpamugna sa Preparedness and Contingency Plan, pagmugna og usa ka Executive Committee og usa ka African Swine Fever Provincial Task Force, dugang pasabot ni Cabarrubias.

Dugang niyang gipasabot ang mga katungdanan sa mga nagkadaiyang mga ahensiya sa gobierno isip mga membro sa Executive Committee. Maingon usab sa pagtumbok sa pipila ka mga sangang buhatan sa gobierno nga mahimong sakop sa African Swine Fever Provincial Task Force.

Samtang, lain Executive Order No. 30 nga gipagawas ni Gov Mercado nga nagtumong sa pagpugong kon pag-ban sa pagsulod sa probinsiya sa Southern Leyte og mga buhi nga baboy, mga karne, mga processed meat nga mga produkto ilabina gikan sa tanang dapit sa Luzon.

Matud ni Dr. Cabarrubias, “Hinoon ang mga buhi nga baboy nga nag-gikan sa Mindanao kinahanglan nga mailalom og hugot nga pagscreening lakip na sa pagpakita og mga papeles sama sa Veterinary Health Certificates gikan sa orihinal nga dapit nga gigikanan, ug uban pang mga dokumento nga nagmatuod nga walay problema sa ASF ang mga buhi nga mga baboy gikan sa Mindanao una tugotan nga mosulod sa probinsiya, sumala sa maong executive order ni Gov. Mercado.”

Gipasabot usab ni Provincial Health Officer Dr. Feliciano John Matibag nga ang contaminado sa African Swine Fever nga mga baboy luwas nga maka-on sa mga tawo.

Matud ni Dr. Cabarrubias nga ang ubang mga probinsiya sama Eastern Samar og Northern Samar, una nang nagdeklara sa pag-ban sa mga buhi nga mga baboy sa pagsulod sa ilang tagsa-tagsa ka mga dapit.

"Ang probinsiya sa Northern Samar mipasalig nga mao ang magbantay nga walay mga buhi nga baboy nga makasulod sa Rehiyon 8 diha agi sa ilang probinsiya og ang probinsiya sa Southern leyte mao usab ang magsiguro nga ang mga baboy gikan sa Mindanao, sigurado nga walay kontaminasyon sa ASF," sumala ni Cabarrubias.

Hinoon didto sa mga pantalan sa Benit, San Ricardo og Lilo-an Ferry Terminal adunay nay mga personnel sa provincial government nga hugot nga mag-check sa matag bagahe, magdala og mga karne og pork-related food products nga mga pasahero, dugang niyang pasabot.

Gipaabot nga adunay mga senemana nga mga tahu nga ipa-abot ngadto sa buhatan ni Governor Mercado kalabot sa developments kalabot sa African Swine Fever monitoring. (LDL/ESG/PIA-8, SoLeyte)

News Feed:

https://pia.gov.ph/news/articles/1027891
Latest News | Philippine Information Agency