Aklanon News: Aklan magahiwat it 'Paskwahan Sa Kapitolyo' ag Pagdungaw

KALIBO, Aklan, Disyembre 9 (PIA) --  Mangin makolor ro palibot it Provincial Capitol Grounds sa maabot nga Disyembre 16, 2019 bangud sa mga nakalinyada nga mga aktibidades it probinsya it Aklan sa pagselebrar it Paskwa.

Ro hiliwaton hay ginatawag nga “Paskwahan Sa Kapitolyo” ag pagakumpunihan it mga aktibidades pareho ku Christmas Costume for Kids, Pagbukas it Paskwahan Sa Kapitolyo ag “Kaon Ta” Food Court, Ceremonial Lighting it Christmas Tree ag mga iwag sa palibot it Capitol, ag Provincial Government Employees Choral Competition.

Ro “Paskwahan sa Kapitolyo” hay gin inisyaran it Gobyerno Probinsyal it Aklan paagi sa Aklan Provincial Tourism Office sa pagkoordinar sa Aklan Culture and Arts Foundation, Inc.

Sambilog pa gid nga atraksyon sa paskwa ngara nga igapakita sa mga Aklanon ag mga bisita hay ro pag presentar it “Pagdungaw: A Glimpse of the Past Gala Show”, nga igapakita it Tumandok it Akean Performing Arts sa Disyembre 19, 2019 alas 6:00 sa hapon sa ABL Sports Complex, Capitol Grounds, Kalibo, Aklan.

Suno  kay Aklan Provincial Tourism Officer Roselle Q. Ruiz, ro paguwa hay may tatlong parte – ro unang parte hay bilang sangka dance-drama nga nakabase sa “Legend of Aklan” nahanungod sa sangka tinuga nga si “Panigutlo”, sangka ginapaboran nga sapat, samtang ro ikaywang parte hay sangka kaeantahan ag saeautan nga presentasyon it mga kantang Inakeanon nga nagapakita it mayad nga pamatasan it mga Akeanon parehas  ku pagiging mainaabi-abihon, pagrespeto sa mga magueang, pagkamahugod, pagkapasensyoso, pag-ulikid sa komunidad, ag iba pa.

Ro ikatlong parte, sa pihak nga parte, hay ro pagpakita it sari-saring nga kapiyestahan it Aklan nga nagapakita it mayad-ayad nga kultura ag tradisyon, ag mga pinasahi nga mga produkto nga makit-an sa mga kabanwahunan it Aklan.

Kapareho man ku mga aktibidades sa pag-sueang-sueang it Paskwa sa Provincial Capitol, ro Pagdungaw hay sangka pagbueuligan it gobyerno probinsyal it Aklan, Aklan Culture and Arts Foundation, Inc., ag Aklan Provincial Tourism Office.(JBG/VGV/PIA6 Aklan)

 

News Feed:

https://pia.gov.ph/news/articles/1031328
Latest News | Philippine Information Agency