Kinaray-a News: Caluya nagpasiguro kang suplay kang pagkaon sa andang kumonidad

SAN JOSE, Antique, Abril 27 (PIA6) –- Nagpasarig si Caluya Mayor Rigil Kent Lim sa mga residente kang isla kang Semirara kag banwa kang Caluya nga may nagakaigo nga suplay kang pagkaon kag iban pa nga mga kinahanglanon bisan nga ginapatuman ang temporaryo nga lock-down  sa Semirara tungod kang kumpirmado nga kaso kang corona virus disease (COVID-19).  

Suno kay Mayor Lim, nagapadayon ang pagtugro kang mga relief goods sa isla kang Semirara kag Caluya.

Ana man nga ginpasalamatan kanday Governor Rhodora Cadiao kag House Deputy Speaker kag Antique Lone District Representative Loren Legarda sa pagtugro kang mga laswa kag sinako kang bugas bilang kabahin kang mga relief packs.

Samtang, naghambal si Semirara barangay captain Catherine Lim nga ang mga relief goods ang ginpangta-o run sa mga Persons Under Monitoring (PUMs), Patients Under Investigation (PUIs), mga pigado, senior citizens, Persons With Disabilities, kag iban pa nga pigado nga sektor kang Semirara.

Natalana man nga itugro ang mga food packs nga nagalakip kang bente singko (25) nga kilo kang bugas kag nanari sari nga laswa nga itugro sa kapin 4,600 nga panimalay sa Semirara.

Sa anang nahauna nga pahayag, naghambal si Mayor Lim nga sanda ang nagapangita kang tikang agud matugro ang mga kinahanglanon  kang mga residente.

Gindayaw man kang alkalde ang mga Caluhaynon sa anda nga pagpaninguha sa pagsunod kang mga pagsulundan sandig sa gin-isyu nga mga executive orders.

Ginapangabay ni Mayor Lim nga matapos run ang kadya nga pandemic tungod ginahimo man nanda ang anda ikasarang rugya sa Caluya kag Semirara agud matapos kag indi run maglapta ang virus. (JSC/LML-PIA6 Antique)

News Feed:

https://pia.gov.ph/news/articles/1040092
Latest News | Philippine Information Agency