Aklanon News: DA may ginatao nga bulig sa mga mangunguma sa Aklan

KALIBO, Aklan, Mayo 11 (PIA6) --  May ginatao nga sari-sari nga bulig ro Department of Agriculture (DA) sa mga mangunguma sa Aklan nga apektado ro andang pagpananum bangud sa COVID-19.

Raya nga mga bulig, suno sa gintao nga impormasyon it Office of the Provincial Agriculturist (OPA), hay ro Survival and Recovery (SURE-COVID) Loan Assistance, Financial Support to SURE Bemeficiaries, ag Financial Subsidy for Rice Farmers (FSRF).

Sa idaeum it SURE-COVID nga programa, ro sangka mangunguma hay makahueam it P25,000.00 nga mabayran sa sueod it 10 anyos ag owa it ginasukot nga interest.

May una nga 439 nga mga mangunguma sa Aklan nga benefisyaryo it raya nga programa nga halin sa mga banwa it Altavas, New Washington ag Batan.

Rayang bulig hay ginatao it DA sa pagsuporta sa tuyo it gobyerno nga buligan ro mga panimaeay sa mga lugar nga apektado it kalamidad  nga makabawi ku andang kapasidad nga mangabuhi ag mag agubay sa mga maintok nga mga mangunguma ag mangingisda paagi sa mga pagpautang ag pag asistir.

Samtang, may 620 nga mga mangunguma ro nakabaton it P5,000.00 kada isaea sa idaeum it programa mga Financial Support to SURE nga mga benefisyaryo.  Suno  sa OPA-Aklan, raya hay para sa rato nga mga mangunguma nga una eon nga nangin resipyente it SURE Loan Assistance.

Sambilog pa nga bulig nga ginatao sa mga mangunguma sa Aklan sa tiyempo ngara it pandemya sa COVID-19 hay ro Financial Subsidy for Rice Farmers.

Raya hay paagi sa pagtao it cash subsidy sa mga mangunguma agud mabuligan sanda sa andang mga kinahangeanon sa tiyempo it Enhanced ag sa makaron nga General Community Quarantine.

Inisyatibo ra it DA kon siin asistihan ro mga mangunguma nga nagatanum sa sang hektarya ukon maisot pa kara nga nakalista sa Registry System for Basic Sectors in Agriculture (RSBSA).

May una nga 19,253 nga mga mangunguma nga magabenifisyo sa idaeum it raya nga programa nga makabaton it P5,000. kada isaea.

Rayang kwarta, suno sa OPA-Aklan, hay pwede ibakae it gamit sa panguma, pagkaon para sa andang pamilya, ukon ano pa nga andang kinahangean.

Sa parte it Gobyerno Probinsyal it Aklan, agud masiguro nga may una pirmi nga pagkaon ag masustinihan ro produksyon kara sa tunga it hangkat it COVID-19, may Seed Assistance Program para sa mga Akeanon bilang suporta sa mga nakatanum it tinuea agud may pirmi nga preska nga pagkaon.

Ro mga habakae nga busoe it tinuean-on hay nag-abot sa P1.2 million, nga ginakumpunihan it petsay, sitao, okra, ampalaya, taeong, patola, kamatis, tangkong, mais, pipino ag kaeabasa.

Ro probinsya hay nagatao man it ibang gamit sapananum pareho it seedling trays ag plastic nga kaang. (JSC/VGV/PIA6 Aklan) 

News Feed:

https://pia.gov.ph/news/articles/1041451
Latest News | Philippine Information Agency