MisOr travel pass, padayong gidagsa sa katawhan

MISAMIS ORIENTAL, May 7 - Padayong gidagsa ang kapitolyo sa tiglukat og travel pass human gipalugwayan ni Gov. Bambi Emano sa rekomendasyon sa mga mayores sa 23 ka lungsod ug duha ka dakbayan ang general community quarantine dinhi sa Misamis Oriental hangtud sa Mayo 15, 2020.

Hinuon, gisunod man sa tiglukat ang social distancing ug nagsuot sa face mask sa ilang paglinya sa Provincial Health Office kung hain makuha ang nasangpit nga travel pass.

Gibaliwala lang sa mga tiglukat sa travel pass ang kainit ug kahasol sa ilang paglinya sa buhatan sa PHO tungod kay nagpatigbabaw ang ilang dakung pagsabot sa hugot nga seguridad sa pamunuan ni Gov. Emano batok sa posibleng pagtakboy sa COVID-19.

Wala kay madunggan nga reklamo ug bagutbot, ang importante alang kanila, nga kung makakuha na sila sa travel pass, mahapsay na ang ilang pagbyahe sulod ug gawas sa dakbayan sa Cagayan de Oro padulong sa Misamis Oriental ug vice versa.

Apan dili tanan makakuha og travel pass, hilabina ang nag-edad 20 paubos ug 60 pataas, kinsa pulos daling matakboyan sa makamatay nga virus, matud sa PHO.

Pipila ka rekisitos nga angay dalhon sa paglukat sa travel pass ang barangay exit pass, company ID o certification nga sila nagtrabaho particular ana nga kampanya ayha sila tagaan sa priority number, dunay gamay interview ayha hatagan sa travel pass.

Alang niadtong maglukat sa travel pass nga gikan sa lugar nga adunay nagpositibo sa COVID-19 ug mosulod sa Misamis Oriental, kinahanglan magkuha sa certification gikan sa barangay nga nagpamatuod nga dili sila persons under monitoring (PUM) ug persons under investigation (PUI).

Tungod sa hugot nga pagpatuman sa seguridad batok COVID-19 dinhi sa Misamis Oriental, malipayong gipahibalo ni Provincial Health Officer Dr. Jerie Calingasan, kinsa chairman sa Provincial Task Force for COVID-19, nga “zero” kon wala pay natala nga nagpositibo sa COVID-19 dinhi sa lalawigan, bisan tuod gipalibotan na kini sa mga silingang probinsiya ug dakbayan nga nagtangag og pipila ka kaso sa killer virus.


News Feed:

https://pia.gov.ph/news/articles/1041302
Latest News | Philippine Information Agency

Comments