Cebuano News: Evacuation centers gidugangan, DSWD padayon ang suporta

CEBU CITY, Sept. 27 (PIA)--Human mihangyo si Naga City Mayor Kristine Chiong sa Department of Environment and Natural Resources (DENR), nga mopatuman og striktong pagpabakwit sa mga residente nga anaa isa ka kilometro gikan sa danger zone, ang City Government sa Naga nag-abli og dugang evacuation centers.

Gikan sa unang 6, nahimo na kining 11, segun pa sa lokal nga Department of Social Welfare and development (DSWD).

Mao kini ang mga mosunod:  Enan Chiong Activity Center, Naga Central Elementary School, Naga National High School, Nalad Elementary School, Apo Cement Gym, Colon Elementary School, Church of the Latter Day Saints, Cepoc Elementary School, Langtad Elementary School, San Fernando Gym ug Cabungahan covered court.

Ang Barangay Cabungahan gym mao ang pinaka bag-ong giablihang center gahapon, diin anaa sa dili moubos sa 30 ka pamilya o 148 ka indibidwal ang temporaryong gapuyo.

Ang DSWD Field Office 7, isip nangulo sa koordinasyon ug pagdumala sa sitwasyon, nagpadayon sa pagpadala og mga kawani nga mag-organisa sa mga evacuation centers, inubanan sa City Government sa Naga ug ang Provincial Social Welfare and Development Office (PSWDO) sa Sugbo.

Ang DSWD padayon ug walay undang nga nagdumala sa mga kalihukan on site.

Matag evacuation center aduna'y “camp manager” ug iyang mga kawani aron sa pagdumala sa mga kinahanglan sa mga bakwit.

Ang maong grupo motabang ‘sab sa mga nagpadayong kalihukan sa ubang ahensya sa gobyerno ug uban pang ahensya sama sa handwashing activity, story-telling and role playing para sa mga bata, psychological debrieifing, medical missions, viewing marathon sa pipila ka mga Sinulog fil entries ug uban pa.

Ang City Government sa Naga nagpatuman na og Centralized Distribution System (CDS) aron mamintinar ang hapsay nga pagpanghatag og relief goods sa mga internally displaced persons (IDPs).

Ang City Government sa Naga ‘sab ang gadawat sa mga donasyon.

Kagahapon, ang mga donasyon gikan sa naglain-laing mga local government units (LGUs), ma pribadong kompanya, pamilya, indibidwal, grupo, mga organisasyon, mga tulunghaan, Office of the Presidential Assistant for the Visayas (OPAV), ang buhatan ni Congressman Gerald Anthony Gullas, ang miabot sa Naga City hall.

Klase-klaseng mga gamit sama sa mga sinina, food items, tubig, banig, balde, malong, habol, dental kits ug uban pa ang mipuno sa city hall lobby.

Ang Office of the City Treasurer sa Naga nakahipos na usab og Php1,012,149.25 gikan sa mga donasyon.

Sa pagkakaron, niabot na og 1,716 ka mga pamilya ang na-displace ug 7,653 ka mga indibidwal.

Sa rekord, adunay 435 ka mga senior citizens, 50 ka persons with disabilities, 180 ka mga puya (0-12 months old) ug 2, 853 ka mga bata nga nag edad 1-17 anyos anga anaa sa mga evacuation centers dinhi. (Jan Karla Madrio/PIA7)

News Feed:

https://pia.gov.ph/news/articles/1013275
Latest News | Philippine Information Agency