Hiligaynon News: Luwas sa katalagaman nga pagamit sang LPG ginpahanumdom

SYUDAD SANG ROXAS, Capiz, Nob. 29 (PIA) – Ginapanugyan sang Department of Energy (DOE) nga nagakadapat baylohan tagsa ka tatlo ka tuig ang rubber hose nga ginagamit sa tangke sang LPG pakadto sa burner ukon lulutu-an agud nga malikaw sa aksidente sang sunog bangod sang nagasungaw nga hose sang tangke.

Kalakip ini sa mga pahanumdom ni Engr. Evander Diola sang DOE – Visayas Field Office nga nakabase sa Cebu sa ginpatigayon nga barangay forum diri sa Roxas City nga gintambongan sang masobra isa ka gatos nga Capiznon nagikan sa nagkalainlain nga sektor sa probinsya.

Gindugang pa ni Engr. Diola nga nagakadapat nagatindog plastar sang tangke sang LPG agud nga ang valve sini ara sa ibabaw agud indi matunaw ang gasket sa sulod sang valve kag ang hose nga ginaagyan sang gas pakadto sa burner.

Nahibaluan nga ang “liquid” nga porma sang LPG amo ang makapasamad sa mga gasket sang valve kag goma nga hose apang ang “vapor” nga porma sang LPG ang indi madali nga makasamad sa gasket kag hose nga naga-angot sa tangke.

Ginpakamaayo man sang humalambal nagikan sa DOE nga mas maayo nga magpatigayon sang regular nga tsek-up sa mga crack kag posible sungaw sang hose pinaagi sa pagamit sang sabon kag tubig agud nga mahibaluan kon may samad ang hose agud maproteksyonan ang propedad sa sunog.

Ang mga ginakabig LPG – resistant nga rubber hose ang sarang mabakal sa mga kilala nga nagabaligya sang LPG.

Samtang ang DOE ang may gin-isyu man nga Department Circular 2013 – 09 – 0022 nga nagamandu sang nagakadapat nga standard sang mga kalargahan sang tangke sang LPG ilabi na sa mga motor kag tricycle agud nga mapat-ud nga indi mahulog ang tangke samtang ginabiyahe.

Sa iya nga bahin, ginpahanumdom naman ni Engr. Renelyn Estiya sang DOE – Visayas Field Office ang mga nagtambong sa barangay forum nga magbakal lamang sang mga tangke sang LPG nga may nagakaigo nga label ukon marking kapareho sang brand kag tare weight o kabug-aton sang tangke magluwas pa nga dapat man usisaon kon ang security seal sang tangke ang intact pa nga nakaangot sa valve sang tangke.

Ginpanugyan dugang ni Estiya nga sa mga may Standards Compliance Certificate (SCC) nagikan sa DOE nga naka-display sa ila tagsa ka mga baligyaan lamang magbakal sang tangke sang LPG

Ang tangke sang LPG ang indi pag-ibutang sa sarado nga mga kabinet sa kusina kag dapat malayo man sa mga switch sang suga’ ukon iban pa nga mahimo halinan sang kalayo.

Samtang ginpanugyan dugang ni Engr. Estiya nga kon maka-obserba sang baho sang LPG sa kusina, nagakadapat nga buksan ang pwertahan kag mga bintana agud mapaayo ang bentilasyon kag likawan ang pag switch sang suga ukon pagsaksak sang mga appliances kon may manotaran nga baho sang LPG.

Ang tangke nga ginahalinan sang sungaw ang nagakadapat nga dal-on sa gwa sang balay apang ginapanugyan man nga magpangayo sang bulig sa retail outlet nga ginbaklan sang LPG ukon sa mga natungdan nga otoridad para sa nagakaigo nga bulig. (AAL/PIA Capiz)

News Feed:

https://pia.gov.ph/news/articles/1015558
Latest News | Philippine Information Agency