Hiligaynon News: Profiling sang WV GIDA barangays magasugod sa Mayo

SYUDAD SANG ILOILO, Abril 30 (PIA) - -Pagapangunahan sang Department of Health ang profiling sang Geographically Isolated and Disadvantaged Areas (GIDA) sa Western Visasyas sumugod sini nga Mayo.

Ang GIDA mga komunidad nga may vulnerable population physically kag socio-economically nga separado gikan sa mainstream.

Suno kay Kristine Solas, GIDA/IP Focal Person sang DOH 6, nga ang GIDA Information System gin-develop nga i-profile ang mga GIDA barangay sa Western Visayas.

Nagahatag ini, suno sa iya,  sang impormasyon natuhoy sa pisikal kag economic nga kinagawi sang komunidad ilabi ang ordinary kag makalalaton nga mga balatian kag mga pasilidad sa ikaayong lawas nga ara sa lugar.

Subong man, ang Information System nagaserbe nga gamit sa monitoring kag evaluation sa mga research-based planning kag sa pag-implementar sang programa.

Suno kay Solas nga ang profiling nga magasugod sa Mayo tubtob sa Agosto 2019, pagapatigayunon sang mga health professional nga kabahin sang Human Resources for Health (HRH) program sa koordinasyon sang mga talatapan sa ikaayong lawas sa lokal nga panguluhan. 

“Ginapaabot nga makumpleto namon ang datos bag-o ang Agosto kag ini ang iga-evaluate kag sekyaron bag-o i-upload sa national system,” pahayag ni Solas.

Gindugang sini nga ang profiling magasakop sa 945 ka mga GIDA barangay sa rehiyon nga ginkilala sang mga LGU sang Abril.

“Pinaagi sini nga aktibidad, may yara kami recording ukon database sang mga GIDA barangay agud mapat-ud ang availability of, equality kag access sa kalidad nga health care,” pahayag ni Solas.

Kabahin ang profiling sa suporta sa Universal Health Care Act nga ginlagdaan ni Presidente Rodrigo Duterte sang Febrero sini nga tuig nga naga-awtomatiko nga nagalista sa tanan nga mga Filipino sa health insurance program sang gobyerno. (JBG/laf/PIA6-Iloilo)

 

News Feed:

https://pia.gov.ph/news/articles/1021406
Latest News | Philippine Information Agency