Hiligaynon News: Tanan nga barangay sa Dao, Capiz hilway na sa droga

SYUDAD SANG ROXAS, Capiz, Abril 25 (PIA) – Gindeklara na nga hilway sa illegal nga droga ang tanan ng kabarangayan sa bug-os nga bawa sang Dao.

Matapos ang maid-id nga validation kag evaluation kag pagsunod sa mga requirements ilabi na sang Regional Oversight Committee, natigayon nga madeklara ang 20 ka mga barangay sa amo nga banwa nga drug cleared ukon hilway sa illegal nga droga.

Ang Dao ang labing una nga bawa nga nadeklara nga drug-cleared nga munisipyo sa probinsya sang Capiz.

Ang tanan nga mga Barangay Anti-Drug Abuse Council (BADAC) sa pagpamuno sang ila tagsa ka Punong Barangay ang nagbaton sang Certificate of Drug Cleared Barangay pinaagi sa isa ka programa sa banwa sang Dao sang Abril 17.

The Regional Oversight Committee ang ginatapuan sang Regional Director sang Philippine Drug Enforcement Agency (PDEA), Philippine National Police (PNP), Department of Health (DOH) kag Department of the Interior and Local Government (DILG).

Suno kay Dao Municipal Health Officer Dr. Mary Humbelyn Horneja nga sa ila 171 ka mga “reformers” 140 sa mga ini ang nagpaidalom sa community-based rehabilitation program (CBRP).

Gintumod man ni Horneja ang kooperasyon kag determinasyon sang mga reformers sa pagtalikod sa paggamit sang ilegal nga droga kag tayuyon nga pagbag-o bilang dako nga kabangdanan nga nangin matalunsay ang amo nga programa.

Ginhangkat naman ni anay mayor Joselito Escutin, nga amo ang nagtiglawas kay Mayor Ernesto Escutin sa amo nga programa, ang mga katapo sang BADAC kag ang bug-os nga komunidad sa pagbulig agud mapadayon ang pagdula sang ilegal nga droga sa ila banwa. (JBG/PIA6-Capiz)

News Feed:

https://pia.gov.ph/news/articles/1021292
Latest News | Philippine Information Agency