Hiligaynon News: Pulis nakabalhag sang 17 ka kaso sang pagpamakal boto

SYUDAD SANG ILOILO, Mayo 16 (PIA) -- Kapin sa 17 ka mga insidente sa pagpamakal sang boto sa Western Visayas ang nabalhag sang Crime Information Reporting Analysis System (CIRAS) sang Police Regional Office 6 (PRO 6)  humalin Mayo 2 tubtub sang adlaw sang lokal kag nasyonal nga eleksyon sang Mayo 13.

Ginpahayag ni Police Lieutenant Colonel Joem Malong, spokesperson sang PRO 6, nga tatlo sa 17 ka mga kaso ang napasaka na sa Prosecutor’s Office.

Nagluntad ining tatlo ka mga insidente sa banwa sang Barotac Nuevo, Ajuy kag Lambunao, tanan sa probinsya sang Iloilo.

Ang asud-asod nga police operations pinaagi sa pagpadala sang mga Anti-Vote Buying Operating Teams nagresulta sa pagkadakop sang 28 ka mga persona, pagluwas sang tatlo ka mga menor de edad kag pagkumpiskar sang P159,890 nga kwarta.

Samtang, walo naman ka mga positibo nga operasyon ang ginpatigayon sa pag-implementar sang pagdumili sang makahulubog nga ilimnon ukon COMELEC Resolution No. 10461 nga nagresulta sa pagka-arestar sang 37 ka mga violators humalin nga ginpatuman ini sang Mayo 12.

Sa pangkabilugan, ginlaragway ni Malong ang pagpatigayon sang lokal kag nasyonal nga eleksyon sa rehiyon sini nga 2019 nga malinong bangud wala sang nabalhag nga mga insidente kaangut sa piniliay sa rehiyon. (JBG/laf/PIA6-Iloilo)

 

News Feed:

https://pia.gov.ph/news/articles/1022051
Latest News | Philippine Information Agency