37 returning OFWs giatiman sa syudad sa CDO

CAGAYAN DE ORO CITY, May 27 - Giatiman sa dakbayan sa Cagayan de Oro ang 37 ka mga returning OFWs atol sa ilang pag-abot adlaw Mayo 25, diha sa Laguindingan Airport gikan sa kaulohan.

Nahimong posible ang pag-uli sa maong grupo dinhi sa dakbayan pinaagi sa 'Balik Probinsya, Bagong Pag-asa' program nga gipangulohan sa gobyerno nasyonal pinaagi sa kamandoan ni Pres. Rodrigo Duterte.

Nagtinabangay ang Humanitarian Assistance Cluster ug Incident Management Team (IMT) sa pagdawat ug pag-areglar sa maong grupo aron hapsay ang pagpailawom kanila sa 14-day quarantine diha sa City Isolation Units.

Matud pa ni Mayor Oscar Moreno, “Dili mahimong i-abandon sa kagamhanan sa Cagayan de Oro. Di nato puwede pasagdan. Ato silang isulod sa city isolation units hangtud nga makompleto ang ilang mandatory quarantine o’ mag-negative ang test sa COVID-19. We should not blame each other, ato ni sila atimanon.”

Miserbisyo usab ang nagkadaiyang buhatan sa gobyerno nasyonal sama sa DILG, OWWA, CAAP, PNP ug mga kagamhanang lokal sa mga OFWs kinsa maoy nagpahigayon sa profiling, paghatud sa ilang lugar, pagpahimutang sa quarantine facilities ug uban pang assistance.

Personal nga mitagbo sa mga repatriated OFWs si Ms. Kathleen Kate Sorilla, Humanitarian Assistance Cluster Assistant Head, ug si Mr. Nick Jabagat, IMT Head, kinsa maoy nangunay sa pagprofile ug misundo sa maong grupo sa nasangpit nga airport.

Gilaumang mas daghan pang mga residente sa dakbayan ang makauli sa mosunod nga mga adlaw pinaagi sa maong repatriation program sa gobyerno nasyonal diin aduna nay biyahe ang mga barko ug eroplano. (Spencer Palen/CIO)

News Feed:

https://pia.gov.ph/news/articles/1042943
Latest News | Philippine Information Agency