Cebuano News: ATI mihitsas sa mga FITS, para sa gusto mananum

CORTES, Bohol, May 13 (PIA) -- Mingbarug sa kasamtangan nga panginahanglan ang Farmers Information Technology Services (FITS) sa Agricultural Training Institute Central Visayas, niining panahon sa gilantaw nga pagkuwang sa tinubdan sa pagkaon dala sa mga nagpadayon nga travel ban.

Kini nga kasayuran maoy gipaambit sa ATI-Regional Training Center sa Central Visayas (ATI-RTC-CV) nga ania dinhi sa Bohol, ubay sa nagkadaku nga panginahanglan sa pagkaon.

TAKNA SA PANGUMA. Gawas sa paghitsas sa mga FITS, ang ATI RTC-7 nga nia sa Bohol nanghatag og himan sa panguma isip premyo sa mga nagsunod sa programa sa kahanginan. Niini nga pamaagi, ang mga kabatan-onan nakakita sa maayo nga ugma sa pagpananum. (PIA Bohol/ATI)
 

Kini human nabati na ang apektado sa pagpugong sa katawhan sa paglakaw-lakaw ug sa paglisud sa pagsulod sa mga produkto dala sa mga palisiya sa pagbyahe sa mga produkto nganhi sa isla nga mga lalawigan tungod sa coronavirus disease (COVID-19).   

“Daku kaayo og kadaut nga dala sa COVID19, dili lamang sa kinabuhi ug ekonomiya apan apil na usab sa panginabuhi-an sa katawhan,” matud pa sa ATI 7 Regional Director Dr Carolyn Mae Daquio.

“Bisan pa sa padayon nga pagsulod sa mga produkto, pipila ka pudyot ra kini nga milagbas, dala sa daghan ang mi-undang sa pagpadala sa mga produkto, ilabi na sa nagagikan sa Mindanao, mao nga nakakita ang mga komunidad sa dali nga panginahanglan nga hulipan ang supply sa pagkaon nga makapalagsik sa lawas,” dugang niya.

Sa pagkakita sa sa ATI – Regional Training Center VII, gihingusgan na niini ang pagduso sa mga serbisyo ug gihitsasan ang FITS centers sa rehiyon.

“Ang FITS centers nag-alagad isip one-stop shop nga makahatag sa paspas nga katali-an sa kasayuran sa pagpanguma ug mga teknolohiya nga mahimong gamiton sa katawhan sa ilang pagtutok karon sa pagpananum sa makaon,” pasabut ni Doris Isabel Racho, information officer sa ATI.

Dinhi sa rehiyon, ang FITS centers kasagaran anaa mahimutang sa mga City/Municipal ug Provincial Agriculture Offices (CAO/MAO/PAO).

Matag FITS center, may gibutang ang ATI nga mga gikinahanglan nga ekipo sa Information Communication Technology (ICT), lakip na ang mga giya ug sumbanan sa pagpananum sa mga utanon ug lagutmon aron makahatag sa mga mahilig mananum sa sayon nga makuha nga kasayuran ug teknolohiya sa panguma.

Gani, niining panahon sa COVID pandemic, ang ATI RTC-VII nagpahimutang og mga liso ug lawngon sa mga FITS Centers aron mas sayun ra ang pagpananum aron may presko nga pagkaon ang matag panimalay ug usab aron maka-abag sa possible nga hulga sa kagutom dungan sa paghimong produktibo sa katawhan bisan sa mga panahon sa kwarantina.

Subay usab niini, sa pagpakig-alayonay sa kagamhanan sa Syudad sa Tagbilaran, sa ATI-7 ug sa Bohol Agriculture Promotion Center nga mga kapamilya sa Department of Agriculture-7, naghatag kini sa nagkadaiya nga liso, lawngon, gamit sa panguma, tamdanan sa pagpananum og utanon ug giya sa urban gardening ngadto sa mga kahugpungan sa mga kababayen-an sa 15 niini ka barangays.

Ang pag-alayonan gutuohan nga magduso sa urban gardening aron kubsan ang epekto sa COVID19 outbreak sa tinubdan sa pagkaon, segun pa sa ATI. (rahc/PIA-7/uban ni Dorris Racho sa ATI Bohol)

News Feed:

https://pia.gov.ph/news/articles/1041630
Latest News | Philippine Information Agency