Hiligaynon News: Distribusyon sang SAP sa 22 ka Iloilo LGUs tapos na

SYUDAD SANG ILOILO CITY, Mayo 3 (PIA6) - - Nakatapos na sang pagpanagtag sang tag P6,000 nga bulig halin sa gobyerno sa mga kwalipikado nga benepisyaryo sa 22 ka mga banwa sa probinsya sang Iloilo.

Ang nasambit nga bulig pinansyal pinaagi sa Social Amelioration Program bangud sa ginapatuman nga enhanced community quarantine sa 22 ang natapos na panagtag sa 22 kas mga banwa sa probinsya sang Sabado, Mayo 2. 

Ang datos sang Department of the Interior and Local Government (DILG) - Iloilo, tubtub ala una sang hapon sang Mayo 2, 2020 nagapakita nga 22 sa 43 ka mga lokal nga panguluhan sa probinsya sang Iloilo, nga ginabug-usan sang 42 ka munisipyo kag component city nga Passi, ang nakatapos na sa pagpanagtag sang SAP bulig pinansyal sa ila natungdan nga lugar.

Nagapadayon man ang distribusyon sa banwa sang Calinog, Carles, Concepcion, Dingle, Duenas, Dumangas, Estancia, Janiuay, Lambunao, Lemery, Leon, Miag-ao, Oton, Pavia, Pototan, San Rafael, Sta. Barbara, Tigbauan, Tubungan, Zarraga kag sa Syudad sang Passi.

Ginpaabot nga ang mga LGU makakompleto sa pagpanagtag sang bulig pinansyal sang Abril 30, apang may mga lokal nga pamunuan nga naghingyo kay Tiglikum Eduardo AƱo sang DILG samtang ang iban kay Tiglikum Rolando Joselito Bautista sang DSWD nga palawigon pa ang distribusyon sang SAP bangud sa mga problema sa proseso sang validation.

Suno kay DILG Iloilo Provincial Director Teodora Sumagaysay nga sang Mayo 1 ginpahibalo sila sang ila rehiyunal nga talatapan nga ang distribusyon ang ginpalawig tubtub sa Mayo 7 sa mga lokal nga panguluhan sa National Capital Region, Rizal, Bulacan, Cavite, Laguna, Cavite, Cebu City kag Davao City.

Samtang, ang mga lokal nga panguluhan nga wala malakip sa mga nahinambitan nga lugar ang ginhatagan sang apat ka adlaw nga ekstensyon.

Ginpalab-ot na ang impormasyon sa mga natungdan nga lokal nga panguluhan sa probinsya, suno kay Sumagaysay.

Ginapanugyan sini sa nabilin pa nga 21 ka lokal nga panguluhan nga padasigon ang distribusyon sang bulig pinansyal sa mga benepisyaryo nga nagakinahanglan sang sini nga ayuda ilabi na sa sining tion sang kabudlayon dala sang COVID 19 pandemic kag para man makasugod man ang mga LGU sang liquidation kag sang ila preparasyon para sa ikaduha ng hugna sang pagpanagtag sang bulig,” pahayag ni Sumagaysay.

Kabilugan nga P1,863,738,000.00 SAP fund ang gindownload sa 43 ka LGUs para sa bulig pinansyal sang gobyerno sa 310,623 ka mga kwalipikado nga pamilya nga ginahatag sa idalum sang “Bayanihan to Heal as One Act.” (JSC/laf/PIA6-Iloilo)

 


News Feed:

https://pia.gov.ph/news/articles/1040761
Latest News | Philippine Information Agency

Comments