Ilokano News: Ilocos Norte, napadayawan gapu't kampania kontra ilegal a droga

LAOAG CITY, Enero 23 (PIA) - - Inpaay ti Department of the Interior and Local Government (DILG) ti 2018 National Anti -Drug Abuse Council Performance Award iti Ilocos Norte kas panangbigbig ti naballigi a nagappuanan ti probinsia para iti nainget a kampania kontra ti panagraira ti ilegal a droga.

 

Mismo a ni Sekretario Eduardo Año ti DILG ti nangiyawat ti pammadayaw kenni Police Senior Superintendent Cesar Pasiwen, agdama a provincial director ti PNP Ilocos Norte, babaen iti maysa a seremonia a napasamak idiay Manila itay nabiit.

 

Pormal nga inpaima ti PNP Ilocos Norte babaen kada Police Superintendent Reynante  Baltazar ken Police Chief Inspector Randy Baoit ti nasao a pammadayaw  kada Bise Gobernador Angelo Marcos Barba ken Bokal Mathew Marcos Manotoc kabayatan ti umuna a regular session dagiti kameng ti Sangguniang Panlalawigan iti kapitolio idi Enero 7, 2019.

 

Segun kenni Police Inspector Wilma Palting, mangidadaulo ti Police Community Relations Office ti PNP Ilocos Norte, naited ti pammadayaw iti Ilocos Norte gapu iti naan-anay a suporta ti probinsia kadagiti kapolisan tapno naballigi ti pannakaisayangkat ti nainget kampania kontra ti ilegal a droga.

 

Babaen ti tulong ti gobierno ti probinsia, nagun-od ti Ilocos Norte ti “85 to 99 functionally points” kabayatan iti 2017 ADAC Performance Audit.

 

Idi 2018, indeklara ti Philippine Drug Enforcement Agency (PDEA) a  “drug-free” dagiti sumaganad nga ili iti Ilocos Norte: Marcos, Carasi, Dumalneg, Adams, Burgos, Currimao, Banna, and Vintar, ken sabali pay a 279 barangays.

 

Idi last quarter ti 2018, 75 nga operasion kontra ti ilegal a droga ti naisayangkat ti PNP Ilocos Norte a nakatiliwan ti 84 a katao, ken nakaalaan 345 a gramo ti nagango a bulong ti Marijuana ken 154 gramo ti shabu. 

 

Basar ti kaudian a rekord ti PNP Ilocos Norte, umaboten ti 6,437 ti drug surrenderees iti probinsia ken umabot metten ti 5,535 ti nakalpas ti Recovery and Wellness Program (RWP) nga isaysayangkat ti kapolisan.

 

Kinuna ni Palting nga agtultuloy ti panaka-monitor dagiti drug surrenderees iti probinsia tapno saandan nga agsubli iti ilegal nga aramid.

 

Dinakamatna nga adda ti “moral and spiritual recovery” nga ar-aramiden ti PNP para kadagiti drug surrenderees manipud iti naduma-duma nga ili ken siudad iti  probinsia.

 

Kinuna a maipapaayan pay ti libre a panagsanay ken panagadal dagiti amin a drug surrenderees iti probinsia babaen ti tulong ti Technical Education Skills and Development Authority (TESDA). (FGL/PIA-1)

News Feed:

https://pia.gov.ph/news/articles/1017498
Latest News | Philippine Information Agency