300 ka mga residente nakapahimulos sa ‘Hatid Serbisyo’ sa Army

KIBAWE, Bukidnon, July 19 (PIA)—Kapin 300 ka mga residente ang nakapahimulos sa “Hatid serbisyo caravan para sa kapayapaan (Service for Peace)” bag-ohay pa lang pinaagi sa paghatag sa libreng serbisyo ngadto sa hilit nga barangay Cagawasan, Kibawe, Bukidnon.

Midugang ang ka-bibo sa “Hatid Serbisyo” tungod kay dungan usab kini sa “mass surrender” kon dinaghan nga pag-surender sa mga tig-suporta sa mga rebeldeng CPP-NPA diin nanumpa sila nga ila nang undangon ang ilang mga bisan unsa nga pakiglambigit ug hinabang sa mga terorista.

Si Punong Barangay Marissa Bayer, ang kapitan sa barangay Cagawasan nga maoy nag-abi-abi sa mga misurender, nagpasalamat ug midayeg sa Philippine Army tungod sa paningkamot sa kasundaluhan nga magmalinawon ang ilang barangay.

“Salamat Philippine Army, adlaw ug gabii walay undang ang inyong paningkamot aron ma-serbisyohan ang katawhan. Karong adlawa, saksi kitang tanan sa kaligdong sa atong kasundaluhan diha sa pagtutok sa ilang mga misyon. Ayaw kamo og kabalaka kay ang katawhan sa barangay Cagawasan makigtambayayong sa atong mga sundalo aron kanunay kitang luwas sa kahadlok ug mahimo kitang lugar nga pinakanindot puy-an,” matud ni Bayer.

Samtang kamulo ang programa, malipayong nagtapok ug naglinya ang mga residente alang sa libreng serbisyo sama sa pag-ibot sa ngipon, urinalysis, prenatal checkup, immunization, libreng alot, pag-apod-apod sa libreng tambal, family planning, health checkup ug uban pang serbisyo.

Ubay-ubay sa mga kabataan ug kababayen-an ang nasilbihan sa Hatid Serbisyo.

Si LtCol Franklin F. Fabic, commander sa 88th Infantry “Maringal” Battalion nga maoy nanguna sa kalihukan miingon nga buot sa kagamhanan nga mo-uswag ang kinabuhi sa katawhan labi na kadtong naa sa hilit nga barangay tungod kay ang kauswagan sa katawhan maoy makapahimong malinawon sa usa ka komunidad.

“Kami ang inyong tinuod nga sundalo; nia kami dinhi aron manalipod kaninyo. Ang inyong suporta ug kooperasyon maoy magdala kanato ngadto sa kalinaw ug komportable nga kinabuhi diin dugay na natong gipangandoy,” miingon siya.  

Kini nga kalihukan pinasubay usab sa mando ni Presidente Rodrigo Duterte nga undangon na ang armadong panagbangi sa nasud. Naa kini nakalatid sa Executive Order No. 70 (EO 70) sa Presidente.

Tumong sa EO 70 nga mahatagan sa pagtagad ug kasulbaran ang mga butang o problema nga maoy hinungdan sa armadong kagubot ug padayonon ang paghatag sa serbisyo ngadto sa lugar nga hilit, apektado sa kasamok, ug dili kaayo kanunay’ng makapahimulos sa serbisyo. (Capt. Norven Jay Garcia, CMO, 88th Infantry Battalion, 4ID, PA/RLRB, PIA Bukidnon)

News Feed:

https://pia.gov.ph/news/articles/1025036
Latest News | Philippine Information Agency